Dolomite beach, sarado sa publiko para sa patuloy na rehabilitasyon

Mananatiling sarado sa publiko ang  Manila Baywalk  dolomite beach kahit tapos na ang Undas.

Ang pagsasara ay ginawa upang bigyang daan ang pagkumpleto sa rehabilitasyon at expansion works nito, ayon sa Department of Environment and Natural Resources (DENR).

Sa press briefing sinabi ni DENR Undersecretary Jonas Leones  na isasara ang dolomite beach para sa  pagtatapos ng ibang gawain sa Manila Bay.

“Ang gusto ng ating Inter-Agency Task Force at ng ating kalihim ay para mag-enjoy ang ating kababayan ay tapusin na po natin lahat ng gawain,” ayon sa opisyal.

Dagdag nito, nakikipag-ugnayan na ang DENR sa  Department of Public Works and Highways at sa  project contractor upang masiguro na walang makapapasok para ‘di maaabala ang gawain sa dolomite beach.

Matatandaang mula noong October 29 hanggang  November 3, isinara ang dolomite beach alinsunod na rin sa kautusan ng Inter-Agency Task Force para sa paggunita ng Undas.

Bukod sa paglilinis  sa tubig ng  Manila Bay, kukumpletuhin din ng  DENR ang repair ng drainage system sa  outfalls ng  Padre Faura at Remedios Abad.

Aayusin din ng ahensya ang fishing areas sa bahagi ng Manila Yacht Club at konstruksyon ng playground para sa mga bata .

Magtatayo rin ang DENR ng dalawang solar  powered comfort rooms, souvenir shops, at administrative office na titingin sa operasyon ng Manila Bay.

Kasama rin sa proyekto ang paglalagay ng light posts sa kahabaan ng baywalk.

Target na matapos ang pagkumpleto sa pagsasayaos sa Manila Bay ngayong taon o  sa unang quarter ng susunod na taon.

(Jocelyn Domenden)

The post Dolomite beach, sarado sa publiko para sa patuloy na rehabilitasyon appeared first on News Patrol.

Dolomite beach, sarado sa publiko para sa patuloy na rehabilitasyon
Source: Trending Filipino News