2nd disqualification case, inihain laban kay Bongbong Marcos

Isang grupo ang naghain ng ikalawang disqualification case laban kay presidential aspirant Ferdinand “Bongbong” Marcos.

Ito ang grupo ng taxpayers na pinamununuan ni Dr. Rommel Bautista.

Ang unang grupo na nag-file ng disqualification case laban kay Marcos ay kinabibilangan naman ng mga aktibista na lumaban sa diktadurya ni dating Pangulong Ferdinand Marcos, ang ama ng presidential aspirant.

Tulad sa unang petisyon, nakasaad sa bagong disqualification case na nagsinungaling si Marcos sa kanyang certificate of candidacy (COC).

Ito ay matapos niyang sabihin na siya ay eligible o maaaring kumandidato kahit pa siya ay na-convict dahil sa tax offenses noong 1995 at naging pinal ito noong 2001, ayon sa petisyon.

Ang unang kasong ay hindi pa nadedesiyunan ng Commission on Elections (Comelec).

“The case has been raffled to the 2nd Division. Owing to a large number of cases on the docket, no summons for this particular case has been issued yet, but is expected within the week,” ayon kay Comelec spokesperson James Jimenez noong Martes, November 9.

Perpetual disqualification

Sa ilalim ng 1997 National Internal Revenue Code, pinarurusahan ang public officials at employees na nahatulan sa tax offenses ng perpetual disqualification o habambuhay na hindi puwedeng makaboto at mahalal sa anumang public office.

Si Marcos ay na-convict ng Quezon City Regional Trial Court (RTC) noong July 27, 1995 dahil sa pagkabigong mag-file ng income tax returns at magbayad ng income taxes  mula 1982 hanggang 1985 noong siya ay vice governor hanggang sa naging  governor of Ilocos Norte.

Noong October 31, 1997, ipinagtibay ng Court of Appeals ang conviction at pinagbabayad ng danyos na itinakda ng trial court, pero tinanggal ang seven-year prison term.

Ang  conviction ay naging pinal pagkatapos na bawiin ni Marcos ang apela sa Supreme Court noong 2001.

Patuloy naman sa paghimok sa Comelec ng mga petitioner na agad na resolbahin ang petisyon.

“This is a matter of fact and the law is clear. The Comelec must exercise its mandated duty to cancel the certificate of candidacy of a disqualified individual running for office based on a final conviction,” sabi ni Fides Lim,  ang spokesperson ng political detainees support group Kapatid.

Sa ilalim ng Section 8 ng Comelec’s rules of procedure, kailangang ma-resolba ng dibisyon ang kaso sa loob ng 10 araw.

Legal duty

Ipinaalala naman ng ikalawang grupo ng petitioner sa Comelec ang “legal duty” nito na kanselahin  ang COC ng sinuman para hindi na makatakbo sa public office dahil sa final conviction.

“The Supreme Court held that the commission’s act of denying due course to and/or canceling a COC in view of a candidate’s disqualification to run for elective office based on a final conviction is subsumed under its mandate to enforce and administer all laws relating to the conduct of elections,” sabi pa ng mga petitioner.

(NP)

 

The post 2nd disqualification case, inihain laban kay Bongbong Marcos appeared first on News Patrol.

2nd disqualification case, inihain laban kay Bongbong Marcos
Source: Trending Filipino News